Vikebladet Vestposten skal vere ein viktig og synleg aktør i lokalsamfunnet. Målet er å setje dagsorden, ha saker som engasjerer innbyggarane og la flest mogleg få kome til orde. Målet er også å spegle det mangfaldige samfunnet vi dekkjer, det gjeld både næringsliv, kulturliv og samfunnsliv. Vi skal setje fingeren på det som ikkje fungerer i lokalsamfunnet, men vi skal også fortelje suksesshistoriene om dei som lukkast. Vi skal vere nær lesarane våre, senke terskelen for å snakke i lokalavisa. Vi skal vere raskt ute med hendingsnyheiter og på nett skal vi halde fram med å vere den største nyheitsportalen på Søre Sunnmøre. Målet er å få endå fleire av lesarane til å bruke det digitalet tilbodet vi har, og sjølvsagt også å få nye lesarar.  Vikebladet Vestposten skal rett og slett vere eit “must” for dei som bur i Hareid og Ulstein.

Også i 2017 kom avisa ut med tre papiraviser i veka, samstundes som vikebladet.no er døgnope. Vi som jobbar her føler nok ofte at tida ikkje strekk til, at vi ikkje får følgt opp alle saker slik vi kunne ha tenkt oss.

Ifølgje Ver Varsam-plakaten er samfunnsoppdraget tredelt: vi skal informere om det som skjer, opne for debatt og overvake dei som sit med makta i samfunnet. 

På vikebladet.no ser vi at lesarane ventar at vi skal vere raskt ute med hendingsnyheiter. Er det til dømes brannutrykking, ser vi at lesartala sprett i vêret. I tillegg til å følgje politi og 110-sentralen på twitter, er vi avhengige av tips og sosiale media for å få med oss slike hendingar. Og i 2017 var saker som handla om ulukker, leiteaksjonar, ferjetrøbbel og lovbrot dei mest lesne på nettsida vår. 

Vikebladet Vestposten følgjer lokalpolitikken tett, og har journalist på alle formannskaps- og kommunestyremøte i både Hareid og Ulstein. Vi meiner det er viktig å følgje med på dei som bestemmer i kommunane og å fortelje lesarane kva som vert sagt og avgjort på desse møta. Vi opplever at mange av lesarinnlegga handlar nettopp om saker som vert behandla av administrasjon og politikarar i dei to kommunane. 

Ulstein Arena er døme på eit kommunalt prosjekt som har skapt engasjement. Bygget i Ulsteinvik sentrum vart opna tidleg i desember 2017, og har symjehall, bibliotek, klatrehall og idrettshall. i skrivande stund er det uklart kva totalprisen blir, og prosjekteringsgruppa har saksøkt Ulstein kommune. Avisa opplevde fleire gongar at Ulstein kommune ville halde opplysningar og dokument om prosjektet hemmeleg. Ein klage til fylkesmannen førte delvis fram: Vikebladet Vestposten fekk delvis medhald i klagen på at avisa vart nekta innsyn i tilrådinga frå formannskapet om overskridingane i Ulstein Arena-prosjektet. 

Då kommunestyret i Ulstein vedtok å innføre eigedomsskatt, avslørte avisa at administrasjon og politikarar hadde brukt feil utrekningsgrunnlag. Det førte til at det måtte kallast inn til eit ekstraordinært kommunestyremøte i romjula. 

Også 2017 var prega av omstilling i næringslivet. Arbeidsløysa både i Hareid og Ulstein var mellom dei høgaste i landet. Mange mista jobben eller var permitterte. Som lokalavis har det vore utfordrande å gjere denne gruppa synleg. Mange skammar seg over å vere utan jobb. 

Den tradisjonsrike familiebedrifta Kleven Verft fekk nye eigarar, mellom dei Petter A. Stordalen gjennom Hurtigruten AS. 

Den såkalla mobbesaka i Ulstein fekk nasjonal merksemd. Kommunen vart også i lagmannsretten dømt til å betale erstatning til Glen Børge Løset Flø, som saksøkte kommunen for at han vart mobba i grunnskulen. Vikebladet Vestposten var til stade og formidla fortløpande på nett då ankesaka vart behandla i lagmannsretten. 

Mange vil nok trekke fram VM-gullet til Karsten Warholm som den største enkelthendinga i 2017. Vi dekte det grundig, men opplevde det frustrerande å vere så langt frå VM-arenaen i London. Det tok mange dagar før vi fekk eit intervju (på telefon) med Warholm. 

Å la flest mogleg kome til orde er eit evig prosjekt. I ein kvardag med stort produksjonspress er det raskt å ty til kjelder ein har snakka med før. Då endar ein gjerne med dei såkalla elitekjeldene, dei som sit med makt. Målet er å få endå fleire “vanlege menneske” i tale. 

I tillegg kan det nemnast at vi i 2017 hadde eit eige bilag i samband med Smak av Ulstein, eigne temasider om Ulsteinmessa og vi samarbeidde om temasider om hus, heim, hage og interiør med Møre-Nytt.